Gal 2 | NdeIBE | STEP | Emva kweminyaka elitshumi lane ngaya eJerusalema futhi, ngalesisikhathi ngiloBhanaba. Ngathatha loThithusi futhi.

Galatians 2

UPhawuli Wamukelwa Ngabaphostoli

1 Emva kweminyaka elitshumi lane ngaya eJerusalema futhi, ngalesisikhathi ngiloBhanaba. Ngathatha loThithusi futhi.

2 Ngaya khona kulandela ukwambulelwa ngethula phambi kwabo ivangeli engilitshumayela kwabezizweni. Kodwa lokhu ngakwenza ngasese kulabo ababekhanya bengabakhokheli, ngokwesaba ukuthi ngangisenza kumbe sengenze umsebenzi oyize.

3 Ikanti loThithusi, owayelami, kazange abanjwe ngamandla ukuba asoke lanxa wayengumGiriki.

4 (Indaba le yavela) ngoba abanye abazalwane bamanga basebengene phakathi kwethu ukuba bahlole ukukhululeka esilakho kuKhristu uJesu basenze izigqili.

5 Kasibavumelanga lakancane, ukuze iqiniso levangeli lihlale likhona kini.

6 Labo okwakungathi baqakathekile – loba kuyini ababeyikho akwenzi mahluko kimi; uNkulunkulu kahluleli ngokubonakala ngaphandle – abantu labo kabengezanga lutho elizwini lami. 7 Esikhundleni salokho babona ukuba ngangiphiwe umsebenzi wokutshumayela ivangeli kwabezizweni, njengoPhethro owaphiwa umsebenzi wokutshumayela ivangeli kumaJuda. 8 Ngoba uNkulunkulu, owafunzelela imfundiso kaPhethro njengomphostoli kumaJuda, wafunzelela lemfundiso yami njengomphostoli kwabezizweni. 9 UJakhobe, loPhethro kanye loJohane, abadume ngokuba zinsika, banika mina loBhanaba ilungelo lobudlelwano bokuba ngabasekeli lapho basebebone umusa engawuphiwayo. Bavuma ukuba siye kwabezizweni, bona baye kumaJuda. 10 Abakucelayo kuphela nje yikuthi kumele siqhubeke sikhumbula abayanga, yona kanye into engangitshisekela ukuyenza.

UPhawuli Uphikisa UPhethro

11 Ekufikeni kukaPhethro e-Antiyoki ngamphikisa sikhangelene, ngoba wayephambanisa.

12 Abantu abathile abavela kuJakhobe bengakafiki yena wayesidla labezizweni. Kodwa sebefikile waqalisa ukuhlehlela emuva wazehlukanisa labezizweni ngoba wayesesaba ababengabeqembu lokusoka. 13 Amanye amaJuda lawo ahlanganyela laye kulokhukuzenzisa kwakhe, kwaze kwathi ngenxa yokuzenzisa kwabo uBhanaba waholelwa ekulahlekeni.

14 Kwathi lapho ngibona ukuba babengenzi okuhambelana leqiniso levangeli, ngathi kuPhethro phambi kwabo bonke, “Wena ungumJuda, kodwa uphila njengowezizweni hatshi njengomJuda. Pho kwenzeka njani ukuba ubambe ngamandla abezizweni ukuba balandele imikhuba yamaJuda na? 15 “Thina esingamaJuda ngokuzalwa hatshi ‘izoni zezizweni’ 16 siyakwazi ukuthi umuntu kalungisiswa yikugcina umthetho, kodwa yikukholwa kuJesu Khristu. Ngakho-ke, lathi futhi, sibeke ukukholwa kwethu kuKhristu uJesu ukuba silungiswe yikukholwa kuKhristu hatshi ngokugcina umthetho, ngoba kakho ozalungisiswa ngokugcina umthetho.

17 “Uma lapho sisafuna ukulungisiswa kuKhristu, kube sokubonakala ukuthi thina ngokwethu siyizoni, lokho kutsho ukuthi uKhristu usekela isono na? Akunjalo lakancane!

18 Uma ngikwakha kutsha lokho engakudilizayo, ngibonakalisa ukuthi ngiyisaphulamthetho.

19 Ngoba ngomthetho ngafa emthethweni ukuze ngiphilele uNkulunkulu.

20 Sengibethelwe kanye loKhristu, akuseyimi engiphilayo, kodwa uKhristu uphila phakathi kwami. Ukuphila engikuphila emzimbeni, ngiphila ngokukholwa eNdodaneni kaNkulunkulu, eyangithandayo njalo yazinikela ngenxa yami. 21 Kangiwudeli umusa kaNkulunkulu, ngoba aluba ukulunga kuzuzwa ngomthetho, uKhristu wafela ize.